نوھمی راجندری پَتّر
بلوچ نیشنل موومنٹ
(بلوچ راجی زْرمبش)
رمس: 14,15,16دسمبر2014
جاہ : آزو کَور ، مکوْران

 

 

سردانک

چَہ روچے کہ مردم سنچ ءِ سیمسراں سر بوت آئی ءَ وتی جند ، کَھول ، ٹک ءُ راجی ھستی ءِ پھزگ ءَ دگہ مردمانی پلپانچ بنا کرت۔چَہ ھما روچ ءَ بزگ ءُ چیردستیں مردم تیوک یا گوں مچی ءَ دیمونی

دیان پلمانچیاں چَہ بن ءَ ولگوج کنگ ءِ کوشست کنان ءُ پیداک اَنت ۔بلوچ راج ءَ دائم وتی ھیسی سرنْدر کرتگ اَنت ءُ وتی ڈیھ ءُ راجی ھستی پھزاِتگ ۔اگاں چِہ انگریزاں پہ وتی پلپانچی لوٹانی پیلو کنگ ءَ مزن پھناتیں بلوچ گلزمین سئے زورگرانی دست ءَ دات بلے داں مروچی بلوچ راج ءَ گوں راجداری ءُ جنگی سرمتابی ءَ منائینتگ کہ آ اے درسیں کارپداں وتی زمینی ، دودمانی ءُ راجی لوٹانی چپ سرپد بیت ءُ رد کنت ۔دومی مزنیں جھانی جنگ ءَ پد جھانی پلپانچیاں برتانیا ءِ سروکی ءَ ھندوستان پْروشت ءُ گوں پاکستانءِ وتگڑیں مھترند ءِ جوڑ کنگ ءَ بلوچانی آجوئی پُل اِت ۔اے زانگ بہ بیت کہ 1962,1958,1948ءُ1973 ؁ء ءَ بلوچ راج ءَ سِلاھبندیں جنگ کرت ءُ پہ وتی آجوئی ءَ دیمونی دات بلے زورگراں پہ وتی زورگری ءِ برجاہ دارگ ءَ گپ ءُ تْران ءِ ھنرسازاِت ،ھمے پیم بازیں باریگاں دژمن مھترند اں راجی آجوئی ءِ زْرمبشءِ دارگ ءِ بے سوبیں کوشست کرت۔ 


جنوری 1987 ؁ء ءَ بی این وائی ایم ءُ1989 ؁ء ءَ بلوچستان نیشنل موومنٹ ءِ جوڑبیگ ءَ پد لھتے نام ءِ راھشونا ں ،رُنگراھاں پرینوکیں دیدانک زرت ءُ چَہ بلوچ جھد ءَ دزکش بوت اَنت بلے پد ءَ ھم چَہ راج آجوئی باھنداں سرشاریں بلوچ ڈیھ ءِ راستیں بچاں 1999 ؁ء ءَ راجداری ءُ جنگی پڑ ءَ گوں راجی آجوئی ءِ دیدانکءَ جنگ برجاہ داشت ۔ 
2003 داں 2004 ؁ء ءَ کماش واجہ گلام مھمد بلوچ ءِ سروکی ءَ بلوچ نیشنل موومنٹ ءِ بن ھشت ایر کنگ بوت ، آئی ءَ راج آجوئی زْرمبش آشوبی رھبندے دات۔  چیئرمین واجہ گلام مھمد بلوچ ءَ گوں وتی آشوبی ھمبلاں آجوئی ءِ کلوہ بلوچ گلزمین ءِ چاریں پھناتاں شنگ کنان کرت ۔ 


3 اپریل 2009 ؁ء ءَ واجہ گلام مھمد بلوچ ، واجہ لالامنیر بلوچ ءُ واجہ شیر مھمدبلوچ زورگریں مھترند ءِ لشکرءَ چَہ تربت ءَ ، چَہ آیانی وکیل ءِ کار گس ءَ آوار جنگ ءَ پد بیگواہ کرت اَنت ۔ 9 اپریل2009 ؁ء ءَ مرگاپ ءَ سئے ئیں راھشونانی ژانگولیں کُنٹ دست کپت اَنت ، آیانی دیمونی ءَ زْرمبش ءَ نوکیں توانے دات ۔دیمونی ءُ بی این ایم ءِ آشوبی باسکانی شپ ءُ روچیں تکانسریانی برورد ءَ بلوچ راجی آجوئی ءِ جنگ ءِ تہ ءَ بی این ایم پُرکار ءُ مُھریں آشوبی گلے ءِ بستار ءَ وتی کرد ءَ پیلو کنگ ءَ اِنت ۔ 

(1) گلءِ مراگش

                           بلوچ راجءَ را سیاسیءُ فکری صورتءَ یک جاگہ کنگءُ پہ بلوچ راجی آجوئیءِ پچگرگءَ جہلءَ نبشتگیں رنگءَ کار کنگ بیت۔

(i)         بلوچ نیشنل موومنٹ پہ بلوچ راجی آجوئیءِ گرگءَ راجدوستیءِ لیکہءِ سرا روان کنتءُ یکجاہیں راجانی گل (اقوام متحدہ)ءِ مسامءِ ہسابءَ بلوچ ڈیہہءِ آجوئیءَ لوٹیت۔

(ii)        آ ہسابءَ کہ درکوماں بلوچ ڈیہہ وَنڈ جتہءُ نشتگ اَنت، بلوچ نیشنل موومنٹ بلوچ ڈیہہءِ اے بہرءُ بانگءَ نہ منّیتءُ جہد کنت کہ بلوچ سرڈگار وتی توامیں اَہدی سیمسراں بہ بیتءُ سرجمیں                         بلوچستان یکیں بیرکءِ ساہگءَ آزاتیں ڈیہے بہ بیت۔

(iii)       بلوچ نیشنل موومنٹ زورگریں درکومانی اسمبلیءُ آہانی زورگریءِ کانونانی دیما بروکیں ادارہانی بہرے نہ بیت۔

(iv)       بلوچ نیشنل موومنٹ جہد کنت کہ گوں ہر ہما گلءَ نظریاتی، فکریءُ آشوبی رہبندانی سرا ہمکاری بکنت کہ آ بلوچ ڈیہہءِ آجوئیءِ جہدءَ کنگا اَنت۔

(v)        بلوچ نیشنل موومنٹ بلوچ چاگردءَ را بدل کنگءُ انچیں چاگردے ٹہینگ لوٹیت کہ اودا سیاسی، مالی، زانشتیءُ ربیدگی دیمروی بہ بیت، درہیں مردم برابر بہ بنتءُ دیمرویءُ انصاف پہ درستیں                مردماں یک ہسابءَ بہ بیت۔

(vi)       بلوچ نیشنل موومنٹ بلوچی زبانءَ را بلوچءِ راجی زبان سرپد بیت۔ بلوچیءُ براہویءُ بلوچانی ایدگہ ماتی زبانءُ لبزانکءِ دیمرویءِ ہاترا جہد کنتءُ اے جہدءَ ہم کنت کہ بلوچستانءَ وانگءُ                     زانگ ماتی زباناں بہ بیت۔

(vii)      بلوچ نیشنل موومنٹ بلوچ ڈیہہءَ درکومیں ہاکمانی کانوداں ہلاس کنگءِ جہدءَ کنتءُ آہانی جاگہءَ بلوچ رسمءُ رَبیتاں گوں انسانی ہکانی جہانی مسامءَ ہمدپ کنتءُ رواج دیگءِ جہدءَ کنت۔

(viii)    بلوچ نیشنل موومنٹ چہ بلوچستانءَ مذہبی نفرت، ٹکّانی وت ماں وتی جنگءُ جیڑہ، زبانانی نیامءَ بے برداشتیءُ کستءُ کینگءَ ہلاس کنگءِ جہدءَ کنتءُ اشانی جاگہہءَ وت ماں وتی مہرءُ                      دوستی، راجی ہم پتّیءَ را دیما برگءِ جہدءَ کنت۔

(1) لوٹءُ گَزَر

بلوچ نیشنل موومنٹ بلوچ ڈیہہءِ سرا بلوچءِ وت واجہیءِ واستا جہد کنت۔ بی این ایمءِ نزّءَ بلوچ راجءِ پدمنتگیءِ بُنی سوب ایش اِنت کہ بلوچ راجءُ بلوچ سرڈگارءِ سرا درکوم ہاکم اَنت، آہاں بلوچ ڈیہہ پہ زور گِپتگ، آہانی ہمے زوریں ادارہ، رَدیں کانود، زالمینءُ نابرابریں چاگردی رہبند بلوچ راجءِ سیاسی، مالی، چاگردی، زانشتیءُ ربیدگی پدمنتگیءِ بُن اَنت۔ پمیشا بی این ایم، پہ بلوچ راجءِ سیاسی، مالی، زانشتی، ربیدگی دیمرویءِ واستاہمے زورگریں درکومانی سرجمیں ہاکمیءُ آہانی سرجمیں کانودءُ نابرابریں چاگردی رہبند ءَ را سرجمیءَ پروشگءِ جہدءَ کنت ۔

 (2) راجی مالی مراگش

(i)         بی این ایم بلوچءِ راجی گزرانکءَ را ہواریں ترز (Mixed Economy) ءِ سرا جوڑ کنگءِ جہدءَ کنت کہ اشیءِ تہا راجی مِلکتءُ زاتی مِلکت ہوار گیجگ بنتءُ یک گہبودی چاگردے ٹہینگ               بیت۔ اے رِدءَ بی این ایمءِ شوندات اے رنگ اِنت کہ ؛

(i)         بی این ایم، بلوچ راجءِ سیاسی، مالیءُ ربیدگی نپءُ سیتاں ہچ رنگءَ دری واکانی دستءَ دیگءَ نہ منّیتءُ بلوچ راجءِ دیمرویءَ بلوچءِ جندءِ آجوئیں تبءِ ہسابءَ دیما برگءِ جہدءَ کنت۔

(ii)        بی این ایم بلوچستانءِ تہا جاگیرداریءُ گرُوناکیں زر داریءِ نشانیاں ہلاس کنگءِ جہدءَ کنتءُ اشانی بدلءَ راجی گزرانکءِ ہسابءَ صنعتیءُ کشاورزی دیمرویءِ کاراں دیما بارت۔ پوریاگر،                     دہکان، کسانیں زمیندار، باپاریءُ ماہیگرپہ راجی گزرانکءِ دیمرویءَ گون کنگ بنتءُ اشانی ہکّ پہازگ بنت۔ راجی صنعتکاریءِ ہمراہیءَ زاتی صنعتکاری ہم دلبڈّی دیگ بیت۔

(iii)       بی این ایم بلوچستانءَ تہیءُ دَرملکی ہچ چشیں باپارءُ زر کاری نیلیت کہ آبلوچ راجی نپءُ سیتانی ہلاپءَ بہ رﺅت۔ گوں میان استمانی کارپوریشناں بوتگیں توامیں مردم دُژمنیں منگ نامہ ہلاس                 کنگ بنتءُ اے رنگیں ہچ زر کاریءِ رَزا دیگ نہ بیت کہ آئیءِ پائدہ پہ بلوچ مہلوکءَ مہ بنت۔

(iv)       توامیں میان استمانی کارپوریشنءُ مالیاتی زر داریں کمپنیانی زرکاریءَ را گوں راجی مالی نظامءَ ہمدپ کنگ بیت۔ بلوچءِ وتی صنعتءُ باپارانءَ چہ مزنیں دری باپاری زر دارانی دستءَ                       پہریزگ بیت۔

(v)        ہَندی صنعتانی پہازءُ دیمرویءِ ہاترا دَری چیزانی آرگ پہ ہساب بیت۔ عیشءُ نوشءِ چیزانی چہ درملکاں آرگءَ را گرءُ دار کنگ بیت دانکہ راج وتی پادانی سرا بوشتیت۔

(vi)       صنعت کاریءِ تہا پبلک سیکٹردلبڈّی دیگ بیت۔ توامیں درملکی کمپنی، بیمہ کمپنیءُ مزن مزنیں مالیاتی ادارہ راجی بُنجاہی بینکءِ مالی نظامءِ سرا گوں یکے دومیءَ بندوک کنگ بنت۔

(vii)      مزنیں اجارہ داری دلپروش کنگ بنتءُ کسانینءُ نیامیگیں زر کاری دلبڈّی دیگ بنت۔ بے ریاءُ روئیں دیمرویءِ ہاترا بلوچستانءَ کارآمدیں صنعت درہیں نیمگاں پچ کنگ بنت۔ گوں دری ملکاں                مالیءُ باپاری نزیکی یے دارگ بیت۔

(viii)     چہ مادنی گواجناں گیشءَ گیش کار گرگءِ واستامادنی صنعت جوڑ کنگ بنت۔ زمینءِ چیرءِ گواجنانی سرا ہر رنگیں واہندی ہلاس کنگ بنتءُ بلوچ ڈیہہءِ توامیں گواجن سرجمیں راجی میراسءِ               ہسابءَ راجءِ دستءَ بنت۔

(ix)       بلوچستانءَ گیسءِ دیمرویءَ را ودّینگءِ واستا الکاپیں گامگیج زورگ بیت۔ گیسءِ کارمرز ءَ را شرءَ چہ شر تر کنگءُ چہ زوالیءَ رکینگءِ واستا گامگیج زورگ بیت۔ بلوچستانءِ درہیں ہندءُ                   دمگاں گیس سر کنگ بیت دانکہ صنعت گیشءَ گیش دیما روان بکننتءُ لوگاں پہ کنورءُ کارءَ ہم ارزانی بہ بیت۔

(x)        زمینءَ ہرجاگہ کہ تیل مان، آئرا درکنگءُ دیمروی دیگءِ واستا گامگیج زورگ بیت دانکہ ملکءِ توکا تیلءِ ہرچی کہ پکاری ہست، آ چہ بلوچستانءِ جندءِ تیلءَ سرجم کنگ بہ بیت، اشیءَ ابید چہ               تیلءَ جوڑ کرتگیں چیز درملکاں دیم دیگءُ بہا کنگ بنت دانکہ ملکءِ کرا زرّ ءمبادلہ گیش بہ بیت۔

(xi)       پہ تیل، گیس، اشکر، یورینیم، آہن، گوکُرت، رود، سہر، زر، جپسم، کرومائیٹءُ اندگہ گواجنانی در کنگءُ کارمرز کنگءَ گوں درملکی کمپنیاں انچیں شرتانی سرا سودا جنگ بیت کہ اِشانی تہا               بلوچ راجءِ نپءُ سیت چہ درستیں چیزاں بالابہ بیت۔

(xii)      پہ چاتکاریءِ صنعتءِ دیمرویءَ الکاپیں گامگیج زورگ بیت۔ چاتکاریءِ دیمرویءِ واستا چہ نوکءَ نوک تریں مشینءُ اوزار دیگ بیت۔

(xiii)     بلوچستانءَ زورگریں راجانی مُشتگیں نیم جاگیرداری ءُ کوہنءُ پدمنتگیں پیداواری سیادیانی ہلاس کنگءُ کشاری گزرانکءَ را نوکیں دورءِ لوٹاں گوں ہمدپ کنگءِ واستا کشاری جوانکاری ءِ                شوندات زیرگ بیتءُ کشاری زمینانی واہندیءِ ہد کم ءَ کم 50 ایکڑ جو کشّتگیں زمینانیءُ پیداوارءِ ہسابءَ ہداگندیں زمینانی واہندیءِ ہد گیشّینگ بنت۔ ءُ دراہیں گیرابادیں زمینانءَ دہکان کارانءَ                واہندی ہکءِ ہسابءَ بہرءُ بانگ کنگ بیت۔

(xiv)     کشاورزیءِ دیمروی دیگءِ ہاترا کِشتءُ کِشارءَ را صنعت جوڑ کنگ بیت۔ دہکانءُ بزگرانءَ نوکتریں کشاورزی مشین، کَدءُ درمان دیگ بیتءُ چرآہاں ہچ پیمیں ناروائیں سُنگءُ وَنڈ گرگ نہ بیت۔

(xv)      دہکانءُ بزگرانءَ چہ سرکارءِ نیمگا وامءُ کُمک دیگ بیتءُ اے وامانی سرا ہچ پیمیں سُوتّ گرگ نہ بیت، دانکہ دہکانءُ بزگر پہ کشارکاریءِ دیمرویءَ کمک کت بہ کننت۔ پہ دہکانءُ بزگرانی                  ہکانی پہازگءَ ملکءَ کانودجوڑ کنگ بیت۔ دہکانءُ بزگرانءَ اے ہک دیگ بیت کہ وتی گلءُ انجمن جوڑ بہ کننت۔

(xvi)     آپ امبار دیمروئی دیگ بنتءُ آپکاریءِ رہبندءَ را نوکءُ شرتر کنگءِ ہاترءَ چیرزمینی آپ ءَ را کارمرز کنگءِ پجّیءَ ہارءِ آپءَ را امبار کنگءِ ہاترءَ کورءُ شیپاں مزن ءُ کسانیں بند بندگ بنت۔

(xvii)    بلوچ نیشنل موومنٹ منّیت کہ روزگار، وانگ، الاج، لوگءُ جاگہءُ ایدگہ بنکی آسراتی ہریکےءِ ہک انت۔ءُ اے زمہ واری استان ئیگ انت کہ اے آسراتیانی دیگءَ گامگیج بہ زوریت۔

(xviii)   سُنگءِ جوانیں رہبندے جوڑ کنگءِ ہاترءَ دیما شتگیں ملکانی وَڑ زورگ بیت۔ سرکاری آمدنءِ درءُ وسیلہانی گیشتر کنگءِ ہاترءَ گزرانکی بلدکارانی بُنجاہے جوڑ کنگ بیت کہ آگِہبودی                         راجمانےءِ جوڑ کنگءِ ہاترءَ سرکاری آمدنءَ را دیمروئیءِ کارانی تہا جوانیں وَڑےءَ کاربندگءِ واستاشوربندی کنت۔

(3) ماہی گری ءُ دریائی گواجن

(i)      ماہی گریءُ دریائی گواجنانی دیمبری ءِ واستا ماہیگرانءَ نوکیں اوزارپہ آسانیں کِستاں دیگ بیت بلے اے ازبابءُ اوزار انچین بنت کہ آ دریائی ساہداراں چُکچین مہ کننت۔ بوجیگ، انجنءُ ماہور               پُجّارینگءُ ہیلکاریءِ واستا گچینی بندبست کنگ بنت۔ دراہیں تیاب دپی دمگاں دِکّہءُ بندن بندگ بنتءُ ماہیگءِ دَرپکاریءُ پہریزگءِ ہاترءَ سارتیں امبارءُ کارجاہ جوڑ کنگ بنت۔ ءُ ماہیگءِ                       پیداوارءَ درملکی نیادیاں برگءِ واستا ہندیءُ میان استمانی تکءَ مانزمانی دیگ بیت۔

(ii)      ہشرکاری انجمن ءُ ماہی کدگ جوڑ کنگ بنتءُ ماہیگرانی گزرانکی ہکّانی پاسپانی ءِ ہاترءَ کانود جوڑ کنگ بنت۔

(4) مالءُ دلوتءُ جنگلی زندءِ پاسپانی

(i)        مالءُ دلوتانی چُکءُ برءُ رمگداری ءِ واستا دلوت کدگ جوڑ کنگ بنت۔ وانڈوئیں مردمانءَ بنکی آسراتی پُجّارینگءِ واستا گامگیج زورگ بنت۔ءُ آہانءَ آپ، لین، لوگ، وانگ، دارگءُ درمان، روّا            ءُ کارءُ روزگاردیگ بیت۔ دلوتانی چُکءُ برءِ واستا جوڑ بیتگیں دلوت کدگءُ مُرگ کدگانءَ گِسی صنعتءِ درجہ دیگ بیتءُ چہ بینکاں وام ءِ آسراتی ہم دیگ بیت۔

(ii)       جنگلی زندءِ پاسپانی کنگ بیت۔ کاہچر، جنگلی ساہدارءُ مُرگانی پاسپانیءُ جنگلانی چارءُ گزارءِ ہاترءَ کانودجوڑ کنگ بنتءُ راجی باگ ہم جوڑ کنگ بنت۔

(iii)      سیلءُ سوادءِ دیمبریءِ واستا وشیں جاگہانءَ چدءُ ڈولدار کنگ بیت۔ سیلکاریءِ کارگلءَ را ہم صنعتءِ درجہ دیگ بیتءُ آئرا زرمبادلہ ءِ ارزشتی وسیلہے جوڑ کنگ بیت۔

(5) رسانکاری

(i)         باپارءُ بارکشّیءِ وسیلہانءَ گوں نوکیں دورءِ لوٹاں ہمدپ کنگءِ واستا بلوچستانءِ سرڈگاری جاورانی ہسابءَ ٹرانسپورٹءِ رہبند جوڑ کنگ بنت۔ دَگ، پُہل، ریل کشک، دریائیءُ بالی نوکیں                      رسانکاری رہبند ءِ سرجمیں کاردامے جوڑ کنگ بیت دانکہ بلوچستانءِ دراہیں دمگ ہمگرنچ کنگ بہ بنت۔

(ii)        ہالرسانی ٹیکنالوجی، نوکیں نپتکاری کاربوجءُ کمپیوٹر ٹیکنالوجی ءِ وسیلہءَ بلوچستانءَ گوں دنیاءَ ہمگرنچ کنگ بیتءُ آئرا گوں نوکیں دورءِ لوٹاں ہمدپ کنگءِ ہاترءَ گوں گشادکاری نوکیں                    ٹیکنالوجی ءُ وانگءُ زانگءِ الکاپیں ادارہ جوڑ کنگ بنت۔

(6) وانگی مراگش

(i)       وانگی ادارہانی تہا ہزگکاریءُ نوک ہزگکاری وانگءِ رہبند ہلاس کنگ بیت۔ راجی زلورتءُ نوکیں دورءِ لوٹاں گوں ہمدپیں وانینگی کتاب جوڑ کنگ بنت کہ آیانی تہا سائنسءُ ٹیکنالوجی، راجی              دپتر، دودمانءُ جوانیں راجی کیلوانی ہیال دارگ بیت ءُ انچین بنت کہ دگہ میان استمانی زانتجاہ ہم آہاں بہ مَنّنت۔

(ii)       تبکیءُ باپاری بنیاداں جوڑ بوتگیں وانگی رہبندہلاس کنگ بیتءُ مہلوکءَ را وانگءِ یک وَڑیں آسراتی پُجّارینگ بیت۔ کلّگاں بنکی وانگجاہ بوجگ بنت۔ وانگ مُپتءُ الّمی بیت۔

(7) دودمانءُ ربیدگ

(i)        بلوچءِ دپتری میراسءِ درجنگءُ پہریزگءِ واستا ہرپیمیں گامگیج زورگ بیت۔

(ii)        بلوچیءُ براہوی زبانءِ لبزانت، شائر، پولکار، ازمکار، اکسکارءُ سازگرانی دِلبَڈّیءِ واستا ادارہ جوڑینگ بنت۔

(iii)       بلوچی دستکاری، دوچکاری ءُ بان بندیءِ دیمبریءِ واستا گامگیج زورگ بنت۔

(8) آجوئیں، راسدیمیںءُ بے پلوداریں ڈَنّی شوندات

آزاد،مثبت وغیرجانبدار خارجہ پالیسی

(i)        بلوچ نیشنل موومنٹ آزاتیں، راسدیمیں ءُ بے پلوداریں درملکی شوندات زوریتءُ دنیاءِ راجانی گومءَ ایمنیں ہم زندیءِ رہبندءِ ہسابءَ برابریءِ بنیادءَ سیاسی، گزرانکی، باپاریءُ ربیدگی سیالداری             جوڑین ایت۔

(ii)        د´رستیں ہمساہگیں ملکانی گومءَ جوانیں سیالداری جوڑینگ بیتءُ یک دومیءِ تہی کاراں دزمانگیجی نہ کنگءِ شونداتءِ سرا کاربندبیگءُ دزبرادریں سیالداری جوڑینگ بیت۔

(iii)       بلوچ نیشنل موومنٹ میان استمانی تکءَ ایمنی، انسان گریءِ مانشت، جمہوریت ءُ راجمانیءُ گزرانکی دیمرویءِ دَستارگءِ ہاترءَ گوں دنیاءِ ایمنی دوستیں واکانی ہواریءَ جنگءُ ایٹمی سلاہانی                ہلاس کنگءِ واستا وتی وسیں جہدءَ کنت ءُ مزن کچّءَ تباہی تالان کنوکیں سِلاہانی تاچءَ ہواریں ملکانی بگیریءَ کنت کہ آ یکجاہیںراجانی گلءِ مُسامءِ لگتمالیءُ میان استمانی کانودانی نہ مَنّگ اِنت۔

(iv)       بلوچ نیشنل موومنٹ ہزگکاریءُ نوک ہزگکاری رہبند، زاتءُ زُریاتءُ ایدگہ پَرک پیرانی ہلاپءَ ہر سنگرءَ جہد کنتءُ ہرہما ملک یا سیاسی جُنز کہ اے بابتءَ جہدءَ انت آہانی گومءَ کُمکّاری                    کنگ بیت۔

(v)        بلوچ نیشنل موومنٹ سامراج دشمنیں راجی آجوئیءِ جنزانی، پوریاگرانی جنزانیءُ جمہویت دوستیں واکانی پلہ مرزیءَ کنت ءُ راجی آجوئیءِ ہک ءَ را ہریک راجےءِ بنکی ہکے سرپد بیتءُ                 ایشیءَ را پہ دنیاءِ ایمنی، انسان گریءِ مانِشت، سیاسی، گزرانکی ءُ راجمانی دیمرویءِ واستا بنیادی چیزے سرپد بیت۔

(9) بنکی انسانی، جمہوریءُ راجمانی ہکانی برجاہیءُ پہریزگ

بلوچ نیشنل موومنٹ بلوچستانءِ سیاسیءُ راجمانی جوڑشتءَ را راجی جمہوری کالبےءَ آرگءِ واستا بنکی انسانی، جمہوریءُ راجمانی ہکانی برجاہیءُ پہریزگءِ مولءُ مرادانی دستارگءَ جہد کنت:

(i)         بلوچ نیشنل موومنٹ، بلوچستانءَ راجی جمہوری سیاستءُ زندمانءُ مہلوکءِ مستریءِ واستا اُلسءَ را زورءُ واکءِ سرچمگ سرپد بیت ءُ مردمءِ دستءَ مردمءِ لُٹّءُ پُلءِ ہلاس کنگءِ واستا جہد                کنتءُ ہر کسی ابید چہ رنگءُ نسل، دینءُ سِتک، زاتءُ جنس، بلوچ ءِ راجی وت مستریءِ کارمانءَ بہرمند بیگ، اُگدہ گرگ یا اُلسی ادارہاں گچین بیگءُ ملکی کاراں وتی نِزّءُ نُگدہءِ پیش کنگءِ               یک ہسابءَ آزاتی ءِ مانزمانیءَ دنت۔

(ii)        راجی جمہوری سیاستءِ سیاسی شونداتءِ بنیادءَ اُلسی جمہوری رہبندے جوڑینگ بیت کہ آ مہلوکءِ گِہبودی، دیمرویءُ وَژہالیءِ مانزمان بیت۔

(iii)       یک مردمے یک اوٹےءِ رہبندءِ رِدءَ مہلوکءِ رائے دہی ءِ ہکءَ مَنّیتءُ آئیءَ پہریزیت۔ گچینکاریءِ جتائیں وَڑءِ جاگہءَ اُمبرءِ ہدّءُ یک مردمے، یک اوٹےءِ بنیادءَ گچینکاریءِ ہوریں رہبند                     زیرگ  بیت۔ءُ نوشتہءُ گُشتانک، گلسازی، وتی گپءِ درشان کنگءِ آزاتی بیت۔

(iv)       جنینءُ مردینءِ نیامءَ پرکاری ہلاس کنگ بیت۔ راجمانءَ جنینءُ مردینءِ ہک برابر بنتءُ بلوچ ءِ راجی دیمرویءِ کارءَ جنینءُ مردین یک ہسابءَ بہرمند بنت۔

(v)        کارءُ روزگار، وانگ، لوگءُ جاگہ، دوائُ درمان، وراک(×)ءُ ایدگہ بُنکی آسراتی دیگ بُنکی ہک منّگ بنتءُ اے ردءَ کُرتنی گامگیج زیرگ بنت۔ 

(vi)       زہگانی ہکانی پاسپانی کنگ بیت۔ آہانی رودینگ، وانگءُ ہیلکاری، جانسلامتیءُ وردنی ہاجتانی سرا دلگوشی دیگ بیت دانکہ آ راجمانءِ دیمرویءَ جوانیں کردے ادا کت بہ کننت۔

(vii)      ہما وانگی ادارہ کہ تبکیءُ باپاری بنیادءَ جوڑ بوتگ انت، آہانی سرا بندش جنگ بیتءُ درستیں مردمانءَ یک وَڑیں وانگءِ آسراتی دیگ بیت۔ وانگ مُپتءُ لازمی بیت۔ ماتی زباناں وانگ بُنکی               ہکءِ ہسابءَ وانگجاہاں رواج دیگ بیت۔

(viii)     بلوچستانءِ شہریءُ کلّگی ہنداں جوانیں ءُ نوکیں وانگی، ازمیءُ سائنسی وانگجاہءُ جانسلامتیءِ بُنجاہ پچ کنگ بنت۔

(ix)       پوریاگرانءَ انجمن سازی، ہڑتالءِ ہکءُ ہوریں سوداکاریءِ ہکءِ دیگءِ واستا جہد کنگ بیت۔ءُ ILO ءِ چارٹرءِ رِدءَ پوریاگرانی ہک پہریزگ بنت۔ پوریاگرانی پَگارگ´رانیءِ ہسابءَ مَیّن کنگ                بیت۔

(x)        پوریاگرءُ آہانی زہگانی اِلاجءُ وانگءِ آسراتی دیگءِ ہاترا صنعتی کانود جوڑ کنگ بنت۔ صنعتی چاگردءِ گہتر کنگءُ کارءِ شرتانءَ آسان تر کنگءِ واستا کانودی بندبست کنگ بیت۔

(xi)       مہلوکءَ را زوتیں انساپ پُجّارینگءِ واستاآمیدگس چہ انتزامیءَ جتا کنگ بنتءُ نوکرشاہیءَ را زوراکی، مال واریءُ ایدگہ ہرابیاں پَہک کنگءِ واستا گامگیج زورگ بنتءُ کانود جوڑ کنگ بنت۔

(xii)      سیاسی کارانی تہا زورشاہی، یک گلی سرکارءُ درجمہوری گامگیجانی دیم دارگ بیتءُ سیاسی گلانی ءُ جمہوری ادارہانی کردمنگ بیتءُ سیاسی کاریچ دیما برگ بیت۔

(xiii)     بلوچستانءَ نشتگیں درستیں لسانیءُ دینی اقلیتانی بنکی جمہوریءُ شہری ہکانی پاسپانی کنگ بیتءُ دراہیں پرکاری کانود کہ راجمانءَ بہرءُ بانگ کننت یا بُنکی انسانی ہکاںلگتمال کننت، ہلاس                 کنگ بنتءُ درستیں مردمانءَ بے پرکءُ پیرءَ برابریں ہکءُ سرہک دیگ بنت۔

(xiv)     ہما درستیں اُلس دژمنیں کانود ڈامیچ کنگ بنت کہ سامراجیءُ ہزگکاری نوکرشاہی، جاگیرداریءُ کاسگ چٹیں زردارانی نپءُ سِیتّانی پاسپانی ءِ واستا جوڑ کنگ بوتگ انت۔ چشیں کانودانی                    جاگہءَ بلوچ ربیتءُ رواجءُ انسانی ہکانی میان استمانی رہبندءَ گوں ہمدپیں کانود رواج دیگ بنت۔

(xv)      پیرانسالیں مردمانی واستا پیرگسءُ نگہداشتءِ بُنجاہ جوڑ کنگ بنت۔ پہ پیریناں بیمہ شوندات بندات کنگ بنت۔ اگاں کسے لنگءُ مُونِس بہ بیت استان آئیءِ د´راہیں ہرچءُ درچاں کشّیت۔ءُ پہ                        کماشاں ہر وَڑیں آسراتی پُجّارینگءِ جہد کنگ بیت۔

(xvi)     بلوچستانءَ نشہی چیزانی باپار، کارمرزءُ تالان کنگ سنگینیں جُرمے لیکگ بیتءُ نشہیانی اِلاجءُ برجاہیءِ واستا گامگیج زورگ بنت۔ ءُ نشہی چیزءُ دگہ راجمانی ہرابیانی گِرءُ دارءِ واستا                      ہمگیریں جہد کنگ بیت۔

(xvii)    ڈاکتر، انجینئر، استادءُ دگہ نوکری کنوکیں کسبدار ءُ ہنرمندیں مردمانی بُنکی ہکانی پاسپانی کنگ بیت۔

(10)      دیمپانی

بلوچ استانءَ ایمنیءِ آرگ، د´ریشاپیءُ مُلک گیریءِ ارادہءُ نیتءَ پہکیں کسب داریں راجی لشکرے ٹہینگ بیت کہ وتی سرڈگاری سیمسرانی پاسپانیءَ کنت۔

سوگند

من____________ بلوچ راج،بلوچستان ءُ بلوچ راجی جہد ءِ شہیدانی سوگندءَ وراں کہ من پہ بلوچ راجی زرمبش ’’ بلوچ نیشنل موومنٹ“ ءِ لوٹءُ گذرانی پیلو کنگءَ ہروڑیں دیمونی دیگءَ چک ءُ پد نہ باں ءُ ہچ چشیں کارے نہ کناںکہ چَہ آئی ءَ بلوچ راج ءُ ”بلوچ نیشنل موومنٹ“ءِ نپ ءُ سیتان تاوان بہ رسیت۔

  • Facebook Social Icon
  • Twitter Social Icon

2018 by Baloch National Movement