ذرْمبش تاک ءِ پیش لبز۔ نبشتہ کار : چئیرمین خلیل بلوچ


ذرْمبش تاک ءِ پیش لبز

نبشتہ کار : چئیرمین خلیل بلوچ

پہ من وشّیں گپے کہ گوں پارٹی ءِ انقلابی جہدکاراں ترْان کنگ ءَ آں، گوں ہما کیڈر ءَ کہ وتی دؤر ءِ راجی جنجالانی دیمپانی اش کرتگ، چہ قومی گلامی ءَ رکّگ ءِ واستا سیاست ءَ ہمگام بوتگ انت ءُ مئے ہواریں جہد ءِ بہر جوڑ بوتگ انت۔

انقلاب ءُ آجوئی ءِ جہد چہ کُلّاں پاک تِر انت ءُ اے کار ءَ دیما بروک الّم پاکیں مردم بنت۔

جاوارانی زانَگ ءُ راجانی چِن ءُ نزّار ءَ انقلابی مردم چہ کلّاں شرتر کُرت کننت۔ اے عمل ءِ تہا اہم تریں کردار انقلابی جہد کارئیگ انت۔ من وا اے گُشاں کہ قومانی ماڑی ءِ بنیاد انقلابی جہدکار ءِ کوپگانی سر ءَ اوشتاتگ انت۔

اگں انقلابی جہدکار ءِ بستار اینکس مزن انت آئی ءِ ذمہ واری ہم ہمینکس باز بنت۔ بلے آئی ءِ ذمہ واریانی گیشینگ ءَ ساری مارا اے گپ ءِ سر ءَ تپاک بوگی ایں کہ انقلابی جہد کار کئے ءَ گُشنت۔ آ کجام صفت انت کہ یک لَس مردمے ءَ انقلابی یے جوڑ کنت؟

ہما کَس کہ چہ پِیستگیں، شونز بَستگیں ءُ اوشتاتگیں جاوراں رکّگ ءِ واستا یک ہواریں عملے ءِ بہرے جوڑ بیت تہ بزان کہ آئی ءِ انقلابی سفر ءِ بندات بوتگ۔ مئے جاوارنی ہساب ءَ انقلابی جہدکار ہما انت کہ وتی ذات ءَ یکّر کنت ءُ وتی قوم ءَ چہ غلامی ءِ ریزتگیں سانکلاں کشّگ ءُ یک انچیں آزاتیں مُلکے ءِ جوڑ کنگ ءَ جہد ءَ انت کہ ہود ءَ ہر مردم ءِ ذہن گوں آزادی ءَ دیمرئی دوستیں سوچ ءُ روایاتاں دیم ءَ بُرت پہ کنت۔

انقلابی جہدکار شما اِت۔ مناں، اگں شما منا اے قابل سرپد بئے۔ گڈا مئے ذمہ واری چے انت؟

پارٹی ءُ پارٹی ڈسپلن

انچو کہ من پیش ءَ گُشت انقلابی جہدکار یک ہواریں عملے ءِ بہرے ءُ ہواریں عمل ءَ تہنا پارٹی دیم ءَ برنت۔ پارٹی ءِ تہا وڑ وڑیں ہیال ءُ فکر ءِ مردم بیت بلے آ یک نظریہ یے ءِ سر ءَ تپاک بنت ءُ یک یا یکے ءَ گیش لوٹانی پورا کنگ ءَ ہواری ءَ کار کننت۔

بلے تہنا مہلوکات ءِ مُچّی ءَ قومی یا انقلابی پارٹی جوڑ نہ بیت۔ چو کہ پارٹی ءِ باسکانی بازیں جیڑہانی سر ءَ وتی وتی ہیال بنت، آوانی ہواریں عمل ءِ برجاہ دارگ ءُ دیما برگ ءِ یا پرْشت ءُ پرْوش ءِ دارگ ءِ واستا یک تنظیمی ڈھانچہ ءُ نظریہ یے الّم انت۔ ایشی ءَ پارٹی ڈسپلن گُشنت۔

پارٹی ءِ باسکانی نیام ءَ اختلاف یک جمہوری ءُ لازمی چیزے۔ بلے اگن پارٹی ءِ تہا ڈسپلن مہ بیت تہ ہمے اختلافانی آسر پرْشت ءُ پرْوش بیت۔ یک انقلابی پارٹی یے ءِ بُنیادی شّری ہمے بوگ لوٹیت کہ آ وتی باسکانی اختلافانی گیش ءُ گیوار ءَ الکاپی ءَ کُت پہ کنت ءُ آہانی نیام ءَ بھروسہ ءُ ہم پّتی ءَ دیما بُرت پہ کنت۔

چریشی ءَ انقلابی جہدکار وتی کاراں الکاپی ءَ کُت کننت ءُ آہانی شُمار روچ پہ روچ گیشتر بوان بیت۔ اگں ڈسپلن مہ بیت جہدکار دلپروشی ءُ پرشت ءُ پروش ءِ آماچ بنت ءُ پارٹی ءِ بود درکئیت ءُ گڈّی ءَ ساہ دنت۔

ڈسپلن ءِ برجاہ دارگ ءِ واستا پارٹی لیڈرشپ ءِ ذمہ واری وا اَست انت بلے باسک ہم بے ذمہ نہ انت۔ لیڈرشپ ءِ کار اِنت یک انچیں آئین یے ءِ جوڑ کنگ کہ جہدکارانی اجتمائی سفر ءِ تہا آہانی رہشونی ءَ کُت پہ کنت۔ اگں پارٹی ءِ باسکانی نیام ءَ اختلافے ودی بیت تہ مرکزی یا دَمَگی لیڈرشپ آئین ءِ ہساب ءَ ہمے اختلاف ءِ ٹہینگ ءَ فیصلہ یے پہ کنت۔

پارٹی باسکانی ذمہ واری ہمیش انت کہ آ وتی ذاتی پسند ءُ ناپسند ءَ یکّر پہ کننت ءُ ہمے فیصلہ ءِ پاسداری ءَ پہ کنت۔ اگں آ چہ دَمَگی لیڈرشپ ءِ فیصلہ ءَ وش نہ انت ءُ ماریت کہ اے فیصلہ آئین ءِ ہساب ءَ نہ انت تہ مرکزی لیڈرشپ ءَ وتی جیڑہ ءَ بہ بارت۔ اگں مرکزی لیڈرشپ ہم ہمے فیصلہ ءَ کنت تہ پارٹی ءِ باسک بائد وتی اختلاف ءَ ہلاس پہ کننت ءُ اجتماعی جہد ءِ تہا وتی کِرد ءَ برجاہ بہ دار اَنت۔

بلوچ نیشنل موومنٹ ءِ بُن ہِشت ایر کنوکیں مئے رہشوناں مارا یک قومی پارٹی یے ءِ ہمرائی ءَ یک تیوگیں منشورے داتگ کہ آہانی مئے نیام ءَ ہست نہ بوگ ءِ وہد ءَ مئے رہشونی ءَ کُت کنت۔ بلے مارا رہشونی زورگ ءِ واستا وتی آئین ءُ منشور وانگ ءُ چارگ لوٹنت۔

بی۔این۔ایم ءِ آئین ءِ رجانک بلوچی، براہوئی، انگریزی ءُ اردو زباناں کَنگ بوتگ انت تا کہ پارٹی باسکاں آئی ءِ سرپد بوگ ءَ ارزانی بہ بیت۔

پارٹی ءِ تہا آئین ءِ پاسداری پارٹی ڈسپلن گُشگ بیت۔ بلے من گُشاں ایشی ءِ بستار انگہ بُرز تر انت۔ پہ ما پارٹی ڈسپلن زند گوازینگ ءِ داب ءُ ڈولے، پہ ما پارٹی ڈسپلن زند رہبندے۔ چیا کہ پارٹی ءِ پروگرام ءِ واستا ما وتی زند باہینتگ انت، زند ءِ وشّی ءُ آسراتی ببا داتگ انت ءُ زند ءِ ہر سہت پارٹی ءِ نام ءَ کتگ۔

اگں انگہ یکّے وتا چہ پارٹی ڈسپلن ءَ بُرزتِر لیکیت ءُ وت سَر بیت ءُ دل ءَ ہمے گُشیت کہ آ پہ پارٹی ءَ نیکی یے کنگ ءَ انت تہ من گُشاں آ چہ پارٹی ڈسلپن ءِ بستار ءُ شَرپ ءَ سرپد نہ انت۔

نظریہ، جہدکار ءُ راج ءَ گوں بندوکی

جہدکارے ءِ واستا اہمیں ہبر ایش انت کہ آ کجام فکر ءُ نظریہ ءِ بنیاد ءَ جدوجہد کنگ ءَ انت، چیا کہ ہر نظریہ ءِ وتی مکسدے بیت ءُ باز وہد ءَ دو نظریہ ءِ مکسد یکے دومی ءِ چَپ بنت۔ نظریہ ہما فکر انت کہ آ تئی عمل ءَ گیشّینت۔

پہ ما نظریہ ہمے واستا ہم سَک اہم انت کہ مارا اے درگت ءَ مانگیشینگ ءِ مزنیں جہدے کنگ بوتگ تاکہ قوم نظریاتی رُنگراہاں گار بہ بیت ءُ عمل ءِ کِشک چہ چمّاں اندیم بہ بیت۔ اے کار بلوچ قوم ءِ دیمرئی، آزاتی ءُ وتواکی ءِ نام ءِ سر ءَ وتساچیں راجدوستانی کُتگین انت۔ اے مئے رہشون ءُ جہدکارانی گوْستگیں پانزدہ سالانی جہد ءِ برکت انت کہ اے نظریاتی مُچ تاں ہدے ءَ ہلاس بوتگ۔

مئے نظریاتی جہدے ءُ مئے نظریہ ءَ را مردم نیشنلزم یا قوم پرستی ءِ نام دنت۔ قوم پرستی ءِ لبزی مانا وتی قوم ءِ عبادت کنگ انت، بزاں گوں وتی قوم ءَ گنوکی ءِ ہدّ ءَ دوست دارگ ءُ وتیگ کنگ۔

پہ ما اے سوال اہم انت کہ جہدکار ءِ گوں وتی قوم ءَ سیادی چوں بہ بیت، چیا کہ جہدکارانی قربانی پہ وتی قوم ءِ آؤکیں اوبادگاں یک شرتر ءُ رژنائیں بانداتے ءِ واستا اَنت۔ پمیشکا انقلابی جہدکار ءِ گوں وتی قوم ءَ سکّیں مہکمیں بندوکی یے الّمی انت۔ چہ بلوچ قوم ءَ منی مکسد بلوچ قوم ءِ کُلّیں مردم انت۔ آہانی تہا مئے مخالف ہم است انت۔ تا وہدیکہ ما گوں وتی مخالف ءَ یک دل پہکیں سیادی یے نہ داریں آ ہجبر مئے جہد ءِ بہرے جوڑ نہ بیت، ءُ غلط فہمی ءُ سرکاری پروپیگنڈہ ءِ وجہ ءَ چہ ما دور بوان بیت۔

جہدکار ءِکردار ءُ عمل پہ مہلوک ءَ مثالے ءُ آئی ءِ کردار ءُ عمل مہلوک ءُ جہدکار ءِ نیام ءِ سیادی ءَ گیشّینت۔ جہدکار ءِ کردار، نندگ ءُ پادآیگ ءُ عمل انچو بہ بنت کہ مہلوک گوں مئے جہد ءَ وتی عملی سیادی یے بہ داریت۔ جہدکار ءِ عمل، کردار ءُ ہبر ءُ ہالانی تہا مردمانی دل ءَ انچیں بانداتے ءِ اُمّیت پاد بئیت کہ پرائی ءِ واستا مات وتی لاڑیں بچّان ءَ زندان جاہاں قربان کنگ ءَ چَک ءُ پد نہ انت۔ اگں خدا مہ کنت کہ جہدکار ءِ عمل ءُ کردار ءِ تہا مہلوک شرتریں بانداتے ءِ بدل ءَ بیمناکیں عکسے بہ گندیت تہ جہدکار ءُ مہلوک ءِ نیام ءَ انچیں دوری یے کئیت کہ آئی ءِ ہلاس کنگ سک گران بیت۔ ایشی ءِ آسر زاہر انت پہ مئے جہد ءَ نیکیں پالے نہ انت۔

شمئے کردار ہمینکس شر ءُ بھروسہ مند بہ بیت کہ مہلوک پہ شمارا وتی دلانی تہا جاگہ دیگ ءَ وشّی بہ ماریت۔ جدوجہد بید ء مہلوک ءِ کُمک ءَ نہ بیت۔ اے بندوکی ہما وہد ءَ دیر جہل ءُ مہکم بیت وہدے جہدکار ءُ مہلوک ءِ نیام ءَ کینگ مہ بیت، دوری مہ بیت۔ اے سیادی انچو بہ بیت کہ جہدکار وتا مہلوک ءِ تہا ہوار گیتک پہ کنت۔ چو ہما وہد ءَ بیت کہ جہدکار ءُ مہلوک ءِ نیام ءَ سیادی بھروسہ ءِ بنیاد ءَ بہ بیت، آہانی نیام ءَ فکری ہم سَنگی بہ بیت تاکہ مہلوک ہمے ہبر ءَ باور بہ کنت کہ جہدکار کہ ہما مکسد ءِ واستا وتی ساہ ءَ سر گوْستگ ءُ جہد ءَ انت آ پہ قوم ءِ شرتریں بانداتے ءِ واستا انت، آہانی ہست بوگ ءِ واستا انت۔

من ہمے سرپد باں کہ جہدکار ءُ لس مہلوک ءِ سیادی یے ءِ بوگ یا نہ بوگ ہمے گپ ءِ سر ءَ انت کہ مردم ، جہدکار ءِ سر ءَ بھروسہ کُت پہ کنت، آ جہد کار ءِ عمل ءُ کرد ءِ تہا وتی واہگاں درگیتک پہ کنت۔ چوش ہما وہد ءَ بوت کنت کہ جہدکار وتا قوم ءِ ہزمت کار سرپد بہ بیت۔

مئے ہست بوگ، مئے زور ءِ وجہ بلوچ قوم انت۔ اگں ما اے راستی ءَ سرپد بہ بئیں تہ راجی جُنز سوبمند بوت کنت۔

جہد کار ءِ زور ءِ بُنزہ بلوچ مہلوک

انّونیں گپے نہ انت، تاریخ گواہ انت کہ جنگ ءِ پڑ ءَ ہما کہ نزور انت ظلم سگّیت ءُ ہما کہ زوراور انت ظلم کنت، تنا وہدے کہ نزور وتی زور ءَ گیش نہ کنت۔

زیردست ءُ غلام بوگ ءِ وجہ ہم ہمیش انت کہ قبضہ گیر ء زور گیشتر انت۔ بلے ہکّیں ہبر ایش انت کہ قبضہ گیر ہر کس بہ بیت آئی ءِ گوں زیردستیں زمین ءُ زمین ءِ زہگاں ہچ وڑیں فطری سیادی نہ بیت۔ آوانی مکسد تہنا ہما زمین ءِ خغرافیائی بستار ءِ وتی حق ءَ کاربندگ ءُ وسائلانی لُٹ ءُ پُل انت۔ پمشکا ہردیں کہ زیردیستیں سرزمین ءَ آزادی ءِ جہد کہ بُنگیج بیت تہ زوراور زمین ءِ ہکّی ئیں زہگانی سر ءَ انچیں ظلم ءُ جبرے بنا کنت کہ آئی ءِ آسر آزاتی ءَ در کئیت۔

قبضہ گیر زانت کہ جہدکار ءِ گوں وتی زمین ءُ راج ءَ یک فکری ءُ نظریاتی بندوکی یے بیت پمیشکا آ وتی قبضہ ءِ دارگ ءِ واستا جَبر ءِ راہ ءَ رؤت ءُ اے جبر ءِ اولی نشانگ بلوچ جہدکار انت۔ اے جبر ءِ دیم ءِ دارگ ءِ واستا جہدکار ءَ وتی راج ءِ پلّہ مرزی الّم انت وگں ناں آ زوراور ءِ دیم ءَ تہنا پہ زور داشت نہ کنت۔

مئے کرّا اے بارہ ءَ باز سرپدی ءِ ضرورت انت۔ مں پیسرا ہم گُشتگ کہ دشمن ءِ دیم ءَ تہنا توپگ ءِ گوماں دارگ سکّیں بے مانائیں ہیالے یا اے گُشگ کہ مئے فوجی زور ہمینچو کہ گیش بیت ما ہمینکس زوت آزاتی ءِ منزل ءَ سر بئیں۔ من سرپد باں کہ اے رَدیں سیاسی فکرے۔ توپگ الّما دشمن ءِ خلاف ءَ اثرمندیں سلاہے بوت کنت ءُ چریشی ءِ اہمیت ءَ انکار نہ بیت۔ بلے راجی جنز ءُ یک آزاتیں چاگردے ءِ گِرگ ءِ واستا اے چہ زانت ءُ علم ءِ طاقت ءَ ہچ وڑ ءَ اہم تر انہ انت۔ چیا کہ توپگ ہم یک فکرے ءَ جہدکار ءِ دست ءَ داتگ۔ یک نظریہ یے ءَ ایشی ءَ را قومی کاروان ءِ بہرے جوڑ کتگ۔ پمیشکا توپگ اہم نہ انت بلکیں ہما نظریہ اہم انت کہ آئی ءَ ترا سلاہبند کتگ۔ ہما راج ءِ ہزمت ءِ سَبک کہ ترا نظریہ دنت ظاقت ءِ بُنزہ ہما قوم انت ءُ تئی زور ہمے ںطریہ ءُ قومی فکر ءِ تہا انت کہ آئی ءِ بنزہ تئی راج انت۔ اگں تہنا سلاہبندیں طاقت ءِ سر ءَ جنگ کٹّگ بوتیں امریکہ ءَ ہجبر ویتنامیانی دست ءَ پرْوش نہ وارت۔

بلوچی راجی آزادی ءِ جنز ءَ مرچی سیاسی پارٹی مہلوک ءِ تہا ءُ چیر اندری ءَ دوئیں پِڑاں عملی کار ءَ انت بلے دوئیں پِڑانی تہا طاقت ءِ مرکز بلوچ عوام انت۔ مہلوک ءِ ہمراہداری ءُ گوں راجی مکسد ءَ آہانی ہم پَتّی جہد ءِ سوبمندی ءِ وجہ بیت۔

اختلاف ءُ وتی ہبر ءِ کنگ ءِ آزاتی

زندگیں راج ءُ پارٹیانی تہا جتا جتائیں ہیال ءُ لیکہ ہست بنت۔ من ہمے سرپد باں کہ قوم ءُ انقلابی پارٹیانی تہا اختلاف دارگ زندگیں راجے ءِ نشانی انت۔ سیاسی جیڑہ، جتائیں فکر ، جاورانی سر ءَ وتی وتی لیکہ ، کار کنگ ءِ وڑ ءُ پیم، عمل ءِ نوکیں گُنجائش، ہمراہانی گچین، کوْہنیں بندوکیانی نوک کنگ ءُ نوکیں سیادیانی جوڑ کنگ ءِ سر ءَ پارٹی ءِ سنگتانی نیام ءَ اختلاف سیاسی عمل ءِ بہر انت کہ چریشاں در رَوگ ءِ ہچ راہ نیست۔ ءُ اے اختلاف پارٹی ءِ ردوم ءُ جہدکارانی ذہنی تربیت ءِ واستا کارمند انت۔

ما ہر باسک ءِ اے حق ءِ منّوک ایں کہ آ وتی ہیال ءُ لیکہانی درشان ءَ پہ کنت۔ پارٹی آئی ءَ را اے موہ ءَ دنت کہ آ مناسبیں فورمانی تہا وتی ہیال ءُ سوجاں ایر پہ کنت۔ اگں آ پارٹی ءِ کجام ہم پالیسی یے ءِ تہا کسان یا مزنیں بدلی یے لوٹیت تہ مناسبیں فورم یا ادارہ ءَ وتی گپ ءَ ایر کُت کنت۔

بلے اختلاف ءِ مانا اے ہم نہ انت کہ آئی ءَ را دُشمنی ءِ رنگ دیگ بہ بیت یا رَدیں شکلے بہ دنت۔ سیاسی پارٹی بے اختلاف ءَ نہ بنت بلے اختلاف ءِ دارگ ءِ راہ ءُ راہبند سیاسی بہ بنت۔ چہ درستاں اہم تر ایش کہ ہبر ادارہانی تہا بہ بیت تاکہ ادارہ ءِ باسک جیڑہ ءِ سر ءَ اکثریتی بنیاد ءَ شؤرے بہ کننت، چیا کہ گُڈی فیصلہ ءِ حق ادارہانی کرّا انت۔ اگں یکے بنیادی رہبنداں لگتمال پہ کنت من سرپد باں آ پارٹی آئین ءَ نہ منّیت۔

بلے اختلاف ءِ دگہ ہم شکلے موجود انت۔ چہ پارٹی ءَ ڈن۔ اے دو قسم ءَ بہر بوت کننت: یکے ہما مردم، پارٹی یا گروہ کہ جُنز ءِ بدواہ انت، راجی جہد ءِ خلاف ءَ کار کنگ ءَ انت، چِست ءُ ایر کنگ ءَ انت، دشمن ءِ ہمرائی ءَ سلاہبند انت۔ گوں آواں سیادی بوت نہ کنت۔ گوں آہاں ہم پتّی ءِ مانا چہ راجی جنز ءَ دزکش بوگ انت۔

دومی قسم ءِ مردم ہما انت کہ بازیں وجہاں وتا گِستا داشتگ اش، سر اش پِر نہ بیت، ردہیالی ءِ وجہ ءَ چہ راہ ءَ گِسر کپتگ انت، پروپیگنڈہ ءِ آماچ بوتگ انت یا پہ حقّی ئیں جیڑہانی سر ءَ کسانیں یا مزنیں اختلاف دار اَنت۔ اے درست اے وہد ءَ جہد ءِ بہر نہ انت ءُ چراہانی بود ءُ زانت ءَ راجی جنز ءَ ہچ وڑیں فائدہ رسگ ءَ نہ انت۔ اے ذمہ واری پارٹی لیڈرشپ ءُ پارٹی کیڈر ئیگ انت کہ آ اے وڑیں مردمانی جیڑہاں گوش بہ دارنت، آہانی سر ءَ بہ جیڑ انت ءُ آوانی گیشوار ءِ واستا پارٹی ءَ وتی سر ءُ سوجاں بہ دینت۔ آہانی غلط فہمی یا بازیں جیڑہانی سر ءَ آہانی سر ءِ پِر نہ بوگ یا ایدگہ اختلافان ءَ ٹہینگ ءِ واستا کار پہ کننت ءُ آوان ءَ پدا عمل ءِ بہرے جوڑ ءَ کنگ ءَ وتی کِرد ءَ پیلہ پہ کننت۔

من پدا گُشاں، شمئے جہد پہ ہر بلوچ ءَ انت بید ء ہماہاں کے شمئے خلاف ءَ سلاہبند انت۔ اے گپ ءَ ہم سرپد بہ بئے کہ تنا وہدے کہ بلوچ راج چہ شمئے عمل ءَ وش نہ بیت مئے جہد بے مانا انت۔

نبشتہ کار بلوچ نیشنل موومنٹ ءِ مرکزی چئیرمین انت۔

Featured Posts
Recent Posts
Archive
Search By Tags
No tags yet.
Follow Us
  • Facebook Basic Square
  • Twitter Basic Square
  • Google+ Basic Square

Abouts

  • Facebook Social Icon
  • Twitter Social Icon

2018 by Baloch National Movement